បន្ទាប់​ពី​រង​ការ​វាយ​ប្រហារ​ផ្ទួន​ៗ​ពី​ពួក​ Hacker មក ដើមអម្ពិល​បាន​ប្ដឹង​ទៅ​អជ្ញាធរ​មាន​សមត្ថកិច្ច​ដើម្បី​ទប់​ស្កាត់​និង​បង្រាប​សកម្មភាព​ បំផ្លាញ​ដំណើរ​ការ​វែបសាយ​ដើមអម្ពិល។ នា​ថ្ងៃ​ទី ១៥ ធ្នូ​ នេះ ដើម​អម្ពិល បាន​ចេញ​ផ្សាយ​អត្ថបទមួយ​ជា​ភាសា​ខ្មែរ​ ផ្សាយ​ថ្កោល​ទោស​ពួក Hacker ទាំង​នោះ​ “វិចារណកថា ៖ វិច្ឆេទកម្មបំផ្លាញ ​គេហទំព័រ ដើមអម្ពិល ” ។ នៅ​ក្នុង​បទ​វិចារណកថា​នេះ ក្រៅ​ពី​ថ្លែង​ថ្កោល​ទោស​ ដើម​អម្ពិល​បាន​សរសេរ​ថា ៖

បញ្ហានេះអ្នកដែលមានចំណេះដឹងខ្ពស់លើបច្ចេកវិទ្យាគេហទំព័រក្នុងប្រទេសកម្ពុជា គួរជួយដល់គេហទំព័រដើមអម្ពិល ក្នុងការទប់ទល់នឹងអំពើវិច្ឆេទកម្ម ពីក្រុមជនអនាមិក ។

តាម​ពិត​ទៅ​ ដើម​អម្ពិល​​ គួរជួល អ្នក​មាន​ជំនាញ​ពិត​ប្រាកដ​ ឲ្យ​មក​ធ្វើ​ការ​ប្រចាំ ក្នុង​នាម​ជា​បុគ្គលិកច្បាស់លាស់​ សម្រាប់​តាមដាន រក្សា​ ថែទាំ វែបសាយ​ដើម​អម្ពិល ជា​ជាង​អំពាវនាវ​ឲ្យ​គេ គួរ​ជួយ ដល់​ខ្លួន​។

តាម​បទពិសោធន៍​របស់​ខ្ញុំ​កន្លង​មក ក្នុង​នាម​ជា​អ្នក​ប្រើប្រាស់​ធម្មតា គ្មាន​ជំនាញ​ខាង​ IT ខ្ញុំ​ដឹង​ថា ពួក Hacker ជា​ពួក​ឧក្រិដ្ឋជន។ សេចក្ដី​អំពាវនាវ​របស់​ដើម​អម្ពិល ជា​មួយ​ឧក្រិដ្ឋជន​អស់​នេះ គ្មាន​ន័យ​សម្រាប់​ពួក​នេះ​ឡើយ គឺ​ប្រៀបដូច​ជា​អំពាវនាវ​កុំ​ឲ្យ​ចោរ​​លួច​អ៊ីចឹង។ អ្វី​ដែល​ត្រូវ​ធ្វើ​គឺ​ការពារ​ខ្លួន​ឯង។   ខ្ញុំ​ជឿ​ថា ពូក Hacker នឹង​មិន​បញ្ឈប់​សកម្មភាព​របស់​ខ្លួន​ឡើយ។​ វែបសាយ​ដែល​ល្បី​ៗ មាន​ធនធាន​មនុស្ស​គ្រប់​គ្រាន់ ដូច​ជា​វែបសាយ​របស់​ស្ថាប័ន​កំពូល​នានា​របស់​អាមេរិច សុទ្ធ​តែ​ធ្លាប់​រង​គ្រោះ ពី​ការ​វាយ​ប្រហារ​​របស់​ពួក​ Hacker ។ ដូច្នេះ​បុគ្គលិក​អចិន្ត្រៃយ៍​សម្រាប់​ថែ​ទាំ​វែបសាយ​មួយ​ជា​កត្តា​ចាំ​បាច់​។

ម្យ៉ាង​វិញ​ទៀត ការ​វាយ​ប្រហារ​ទៅ​លើ​វែបសាយ​មួយ​ដែល​សរសេរ​ជា​ភាសា​ខ្មែរ មិន​មែន​សុទ្ធ​តែធ្វើ​ឡើង​ដោយ​ Hacker ជា​ជនជាតិ​ខ្មែរ​នោះ​ទេ !!!។ ដូច្នេះ ការ​អំពាវនាវ​ជា​ភាសា​ខ្មែរ​ឲ្យ​ពួក​នោះ​ស្ដាប់​ ​គ្មាន​ប្រសិទ្ធិភាពឡើយ។ ពួក Hacker មាន​នៅ​គ្រប់​កន្លែង វាយ​ប្រហារ​មាន​ច្រើន​រូបភាព។ កុំ​ថា​ឡើយ​វែបសាយ​ដើម​អម្ពិល ដែល​ល្បី​ល្បាញ​នៅ​ស្រុក​ខ្មែរ សូម្បី​តែ​វែបសាយ​ dahlina.com នេះ​ ក៏​ធ្លាប់​ត្រូវ​គេ​វាយ​ប្រហារ​ អបអរ​ឆ្នាំ​ថ្មី​ខ្មែរ​ដែរ។ នៅ​ពេល​នោះ Hacker បាន​បង្កប់​កូដ​ខ្លះចូល​ក្នុង​ស៊ែវ័រ ដែល​កូដ​នោះ​បាន​បង្វែរ​អ្នក​អាន​ទៅ​រក​វែបសាយ​ផ្ដេស​ផ្ដាស​ផ្សេង​ទៀត។