ឡានកំលាំង១២សេះ ១៤សេះ …ក្នុងតារាងពន្ធជាអ្វី?

On 12.02.09, In G. Knowledge, by វិចិត្រ

តាមច្បាប់ថវិកា២០១០បានកំនត់ថ្លៃពន្ធលើយានជំនិះដូចតទៅនេះ

- ឡានមានកំលាំងលើសពី ១២សេះទៅ១៧សេះ ប្រើប្រាស់ពីឆ្នាំផលិតទៅដល់៥ឆ្នាំត្រូវបង់៥សែនរៀលក្នុងមួយឆ្នាំ និងលើសពី៥ឆ្នាំត្រូវបង់៣៦ម៉ឺនរៀល

- ឡានលើស ១៧សេះទៅ២៤សេះ ពីឆ្នាំផលិតទៅដល់៥ឆ្នាំត្រូវបង់១,៦លានរៀលក្នុងមួយឆ្នាំ និងលើសពី៥ឆ្នាំត្រូវបង់១,២លានម៉ឺនរៀល

- ឡានលើសពី២៤សេះត្រូវបង់២លានរៀលក្នុងមួយឆ្នាំ

រថយន្តមានកំលាំងក្រោម១២សេះត្រូវបង់ដូចធម្មតា។

តែបើយើងពិនិត្យលើកំលាំងម៉ាស៊ីនរថយន្តវិញ ដូចជាគ្មានរថយន្តដែលមានកំលាំង១២សេះ ១៧សេះ ២៤សេះនោះទេ។

ឧទាហរណ៍

- Toyota camry 2000 CE: 2,2លីត្រ, 136សេះ, ពីស្តុង4, អង្កត់ផ្ចិតពីស្តុង(bore) 87mm

- Toyota Highlander 2010 Base Sport: 2,7លីត្រ, 270សេះ, ពីស្តុង4, អង្កត់ផ្ចិតពីស្តុង(bore) 89,9mm

- Lexus RX 350 4dr FWD, 2009: 3,5លីត្រ, 270សេះ, ពីស្តុង6, អង្កត់ផ្ចិតពីស្តុង(bore) 94mm

- Lexus GX470 2009: : 4,7លីត្រ, 235សេះ, ពីស្តុង8, អង្កត់ផ្ចិតពីស្តុង(bore) 94mm

យើងឃើញថាឡានធម្មតាដែលគេប្រើប្រាស់ជាទូទៅ ក៏មានកំលាំងម៉ាស៊ីនចាប់ពី១០០សេះឡើងទៅដែរ មានន៍យថាធំជាង១០សេះជាងហ្នឹងឆ្ងាយណាស់!!!។ ដូច្នេះ ហេតុអ្វីក៏នៅក្នុងតារាងពន្ធនិយាយតែពីឡាន១០សេះជាងយ៉ាងនេះ?។ ជាពិសេសទៅទៀតនោះឡានធំដូចជា Lexus GX470 មានអនុភាពតូចជាងឡាន Lexus RX 350 ទៅទៀត។

ដំនោះស្រាយ៖ Google !!!!!

ខ្ញុំរកឃើញពាក្យ Taxable horsepower រឺ RAC horsepower មានន័យថាចំនួនសេះដែលគេប្រើដើម្បីបង់ពន្ធឡាន។ ចំនួនសេះនេះ ជាចំនួនអាស្រ័យនឹងទំហំស៊ីឡាំង។ គេកំនត់តាមរូបមន្ត៖

$\displaystyle RAChp=\frac{D^2 \times n}{1613}$

ដែល D ទំហំរបស់bore គិតជាmm ; n ជាចំនួនពីស្តុង។

ដូច្នេះ

- Toyota camry 2000 CE: 2,2លីត្រ, 136សេះ, ពីស្តុង4, អង្កត់ផ្ចិតពីស្តុង(bore) 87mm ត្រូវនឹង $\displaystyle RAChp=\frac{87^2 \times 4}{1613}=18,7$ សេះ

- Toyota Highlander 2010 Base Sport: 2,7លីត្រ, 270សេះ, ពីស្តុង4, អង្កត់ផ្ចិតពីស្តុង(bore) 89,9mm ត្រូវនឹង $\displaystyle RAChp=\frac{89,9^2 \times 4}{1613}=20$ សេះ

- Lexus RX 350 4dr FWD, 2009: 3,5លីត្រ, 270សេះ, ពីស្តុង6, អង្កត់ផ្ចិតពីស្តុង(bore) 94mm ត្រូវនឹង $\displaystyle RAChp=\frac{94^2 \times 6}{1613}=32,8$ សេះ

- Lexus GX470 2009: : 4,7លីត្រ, 235សេះ, ពីស្តុង8, អង្កត់ផ្ចិតពីស្តុង(bore) 94mm ត្រូវនឹង $\displaystyle RAChp=\frac{94^2 \times 8}{1613}=43,8$ សេះ

យើងឃើញថាតំលៃសេះខាងលើត្រូវគ្នានឹងលំដាប់តំលៃលេខដែលកំនត់ដោយក្រសួងហិរញ្ញវត្ថុមែន។ ដូច្នេះបើវាជាតំលៃខាងលើមែន គេមិនគួរប្រើពាក្យកំលាំងម៉ាស៊ីននោះទេ គួរប្រើពាក្យចំនុះពីស្តុងរឺទំហំពីស្តុងវិញ។

Share and Enjoy: