ប្រវត្តិភេសជ្ជៈគោជល់

ភេសជ្ជៈ Red Bull របស់ប្រទេសអូទ្រីស

The Red Bull ជាម៉ាកភេសជ្ជៈប៉ូវកំលាំងមួយប្រភេទ សំរាប់អ្នកធ្វើការធ្ងន់អត់ងងុយដូចជាអ្នកបើកបរជាដើម។

ភេសជ្ជៈនេះផលិតដោយក្រុមហ៊ុនប្រទេសអូទ្រីស Red Bull GmbH ។ នៅឆ្នាំ២០០៦ ក្រុមហ៊ុននេះលក់ភេសជ្ជៈនេះបាន៣ពាន់លានកំប៉ុងនៅលើប្រទេសចំនួន១៣០។

ភេសជ្ជៈនេះមានប្រវត្តិកើតចេញមកពីភេសជ្ជៈគោជល់របស់ប្រទេសថៃដែលមានឈ្មោះថា ក្រទីងដែង (ខ្ទីងក្រហម? គោក្រហម?)។ លោក Dietrich Mateschitz ជនជាតិអូទ្រីសបានស្គាល់ភេសជ្ជៈនេះនៅពេលគាត់ទៅលេងប្រទេសថៃនៅឆ្នាំ១៩៨២។ គាត់ក៏កើតមានគំនិតយកភេសជ្ជៈមកធ្វើអាជីវកម្មជាលក្ខណៈអន្តរជាតិ។

Dietrich បានសហការគ្នាជាមួយជនជាតិថៃ Chaleo Yoovidhya ដែលជាម្ចាស់របស់ក្រទីងដែង បង្កើតក្រុមហ៊ុន Red Bull GmbH ឡើង។ ភេសជ្ជៈRed Bull មានរសជាតិសាបជាងក្រទីងដែងបន្តិចដោយសារបន្ថែមជាតិកាបូណាត។

នៅឆ្នាំ២០០៨ ទស្សនាវដ្តីForbes បានចាត់ថ្នាក់ Chaleo និង Mateschitz ជាសេដ្ឋីលំដាប់២៦៤ដោយម្នាក់ៗមានទឹកប្រាក់ប្រមាណជា៤ពាន់លានដុល្លារ។

សារធាតុផ្សំរបស់គោជល់

Red Bull មានជាតិតូរីន, Glucuronolactone, កាហ្វេអ៊ីន, វីតាមីនបេ, sucrose និងគ្លុយកូស។ រូបមន្តគ្រឿងផ្សំនេះ យកតាមលំនាំភេសជ្ជៈគោជល់ ក្រទីងដែងរបស់ថៃ ដែលភេសជ្ជៈក្រទីងដែងនេះទៀតយករូបមន្តផ្សំតាមភេសជ្ជៈ Lipovitan របស់ជប៉ុននិង Bacchus-F របស់កូរ៉េ។

នៅថ្ងៃ២ មិថុនា ២០០៩ និង ខែមេសា២០០៩ មន្ត្រីហុងកុងបានអោយដឹងថា ភេសជ្ជៈគោជល់ខ្លះដែលនាំចូលពីប្រទេសអូទ្រីសមានជាតិកូកាអ៊ីនប្រមាណជា0,1-0,3 មីក្រូក្រាមក្នុងមួយលីត្រ។ នៅប្រទេសអាល្លឺម៉ង់ រដ្ឋចំនួន១១ក្នុងចំនោមរដ្ឋទាំង១៦បានហាមប្រាមការដាក់លក់ភេសជ្ជៈនេះ ចាប់តាំងពីថ្ងៃ២៥ ឧសភា២០០៩។

ការពិសោធលើភេសជ្ជៈគោក្រហម Red Bull ពីផលប៉ះពាល់របស់វាបានបង្ហាញអោយឃើញថា មនុស្សម្នាក់ដែលមានភាពទន់ខ្សោយទប់ទល់នឹងជាតិកូកាអ៊ីន ត្រូវផឹកភេសជ្ជៈនេះចំនួន២លានកំប៉ុងក្នុងមួយលើកទើបអាចធ្វើអោយគាត់ឈឺបាន។

ភេសជ្ជៈគោជល់របស់ថៃ