កម្ពុជាត្រៀមធ្វើសមយុទ្ធយោធាបាញ់គ្រាប់មីស្ស៊ីលនៅថ្ងៃព្រហស្បតិ៍នេះ

មន្រ្តីយោធានៃប្រទេសកម្ពុជាបានថ្លែងឱ្យដឹងនៅថ្ងៃច័ន្ទម្សិលមិញថា យោធាកម្ពុជានឹងចាប់ផ្តើមធ្វើសមយុទ្ធយោធាមួយដែលប្រើប្រាស់គ្រាប់កាំភ្លើងធុនធ្ងន់ ពិតប្រាកដ ដែលមិនធ្លាប់មានធ្វើនៅឯខេត្តកំពង់ឆ្នាំងនៅថ្ងៃព្រហស្បតិ៍សប្តាហ៍នេះ។

អ្នកនាំពាក្យក្រសួងការពារជាតិខ្មែរ លោកឧត្តមសេនីយ៍ ឈុំ សុជាតិ បានថ្លែងឱ្យដឹងថាការធ្វើសមយុទ្ធដែលមានការបាញ់កាំជ្រួចមីស្ស៊ីលក្នុងរយៈចម្ងាយ៤០គីឡូម៉ែតនោះ នឹងមានការចូលរួមពីយោធាខ្មែរចំនួន៤០០នាក់។

បើតាមការបញ្ជាក់របស់លោកឧត្តមសេនីយ៍ ឈុំ សុជាតិ ការធ្វើសមយុទ្ធយោធានេះ គឺធ្វើឡើងក្នុងក្របខណ្ឌកងយោធពលខេមរភូមិន្ទកម្ពុជាតែប៉ុណ្ណោះ ពោលគឺពុំមានការចូលរួមពីភាគីណាផ្សេងនោះទេ។ លោកបានបន្ថែមទៀតថា សមយុទ្ធយោធានេះទៀតសោត គឺដើម្បី សាកល្បងសមត្ថភាពកងទ័ពរបស់ខ្លួន ក៏ដូចជាសាកគ្រាប់កាំភ្លើងធុនធ្ងន់ ក្រោយពីខកខានមិនបានប្រើប្រាស់បន្ទាប់ពីបញ្ចប់សង្រ្គាមស៊ីវិលនាឆ្នាំ១៩៩៨មកនោះ។