កម្ពុជា-វៀតណាម ប្រកាសបើកច្រកពាណិជ្ជកម្ម ដោយសេរីតាមទន្លេមេគង្គ

នៅក្នុងខណៈពេលដែលមេដឹកនាំកំពូលរបស់ប្រទេសវៀតណាមកំពុងតែ បំពេញទស្សនកិច្ចនៅក្នុងប្រទេសកម្ពុជា គណៈកម្មាធិការទន្លេមេគង្គ បានអះអាងថា ប្រទេសទាំងពីរនេះបានឈានដល់កិច្ចព្រមព្រៀងថ្មីមួយលើការបើកច្រក ពាណិជ្ជកម្មតាមដងទន្លេមេគង្គ។ ការបើកច្រកទន្លេមេគង្គ ដើម្បីឲ្យមាននាវាទេសចរណ៍ដោយសេរីនោះត្រូវគេគិតថា នឹងជួយដល់ការអភិវឌ្ឍន៍សេដ្ឋកិច្ចប្រទេសទាំងពីរ។

យោងទៅតាមសេចក្ដីប្រកាសព័ត៌មានមួយ របស់គណៈកម្មាធិការទន្លេមេគង្គ កាលពីថ្ងៃទី ១៧ ខែធ្នូកន្លងទៅនេះ បានឲ្យដឹងថា ប្រទេសទាំងពីរបានឈានដល់កិច្ចព្រមព្រៀងលើសន្ធិសញ្ញាមួយដែលនឹង អនុញ្ញាតឲ្យមានការផ្លាស់ប្ដូរពាណិជ្ជកម្ម និងដឹកជញ្ជូនដោយសេរីតាមបណ្ដាផ្លូវទឹកទាំងឡាយនៅអាងទន្លេមេគង្គ ដែលហូរកាត់ប្រទេសទាំងពីរ។

លោក មុំម ស៊ីបុន រដ្ឋលេខាធិការក្រសួងសាធារណការនិងដឹកជញ្ជូន បានអះអាងនៅ ក្នុងសេចក្ដីប្រកាសព័ត៌មាននោះថា «ទន្លេមេគង្គ និងដៃទន្លេទាំងអស់រវាងកម្ពុជា និងវៀតណាមឥឡូវនេះបើកចំហជាផ្លូវការហើយ»។

លោកបានបន្តទៀតថា នេះគឺជាជំហានប្រវត្តិសាស្ត្រមួយថ្មី ដែលមិនត្រឹមតែកែលំអនូវគុណភាព និងប្រសិទ្ធភាពនៃការដឹកជញ្ជូនតាមផ្លូវទឹកនៅក្នុងតំបន់ទន្លេ មេគង្គប៉ុណ្ណោះទេ ប៉ុន្តែនៅពេលខាងមុខវានឹងជួយបង្កើនដល់សក្ដានុពលនៃការនាំចេញ និងជួយកម្ពុជាព្រមទាំងវៀតណាមឲ្យសម្រេចបាននូវផែនការកាត់បន្ថយភាព ក្រីក្រផងដែរ។

លោក ជេរេមី បឺត (Jeremy Bird) អគ្គនាយកប្រតិបត្តិនៃគណៈកម្មាធិការទន្លេមេគង្គ បានអះអាងថា កិច្ចព្រមព្រៀងថ្មីនេះនឹងពង្រីកសកម្មភាពផ្លាស់ប្ដូរពាណិជ្ជកម្ម កាន់តែច្រើនឡើងថែមទៀតរវាងកម្ពុជា និងវៀតណាម។

លោកបានបញ្ជាក់ថា «តាមរយៈសន្ធិសញ្ញានេះ រដ្ឋាភិបាលកម្ពុជានិងវៀតណាម បានយល់ព្រមឲ្យអ្នកប្រើប្រាស់ផ្លូវទឹកទាំងអស់អាចដឹកជញ្ជូន និងផ្លាស់ប្ដូរពាណិជ្ជកម្ម និងធ្វើដំណើរទៅវិញទៅមកដោយសេរី»។

ក្រៅពីវិស័យពាណិជ្ជកម្មនិងដឹកជញ្ជូននោះ ការប្រកាសបើកចរាចរណ៍គ្រប់ច្រកទាំងអស់នៅអាងទន្លេមេគង្គរវាង កម្ពុជានិងវៀតណាមនេះ ក៏ជំរុញដល់ការផ្លាស់ប្ដូរវិស័យទេសចរណ៍របស់ប្រទេសទាំងពីរផងដែរ។

លោក បឺត បានបញ្ជាក់ថា «សន្ធិសញ្ញានេះនឹងជួយឲ្យនាវាគ្រប់ប្រភេទ ដោយរួមទាំងនាវាទេសចរណ៍អាចចេញចូលកំពុងផែនានានៅក្នុងតំបន់ដែនដី សណ្ដទន្លេមេគង្គនៅវៀតណាមទីក្រុងភ្នំពេញ សៀមរាប និងទីកន្លែងទាក់ទាញទេសចរណ៍នានាបាន»។

ការផ្លាស់ប្ដូរពាណិជ្ជកម្មរវាងកម្ពុជានិងវៀតណាមនៅពេលនេះភាគច្រើន គឺធ្វើឡើងតែតាមរយៈការដឹកជញ្ជូនផ្លូវគោកតែប៉ុណ្ណោះ។

នៅក្នុងវេទិកាធុរកិច្ចនិងវិនិយោគដែលរៀបចំ កាលពីថ្ងៃទី១៦ ខែធ្នូ កន្លងនេះលោក ស៊ុន ចាន់ថុល អនុប្រធានប្រចាំការនៃក្រុមប្រឹក្សាអភិវឌ្ឍន៍កម្ពុជា បានឲ្យដឹងថា រហូតមកដល់ពេលនេះ កម្ពុជាមានផ្លូវជាតិជាច្រើនខ្សែកំពុងតែបម្រើដល់ការដឹកជញ្ជូន និងផ្លាស់ប្ដូរជាពាណិជ្ជកម្មរបស់ប្រទេសទាំងពីរ។

លោកបានឲ្យដឹងថា មកដល់ពេលនេះកម្ពុជាមានផ្លូវជាច្រើនខ្សែដែលតភ្ជាប់ទៅវៀតណាមនៅ ក្នុងនោះមានផ្លូវជាតិលេខ១ លេខ២ លេខ២១ លេខ៣៣ លេខ៧២ លេខ៧៤ និង លេខ៧៨ ជាដើម។

បើទោះបីជាការផ្លាស់ប្ដូរ និងភ្ជាប់ការដឹកតាមផ្លូវគោកកំពុងតែមមាញឹកយ៉ាងណាក៏ដោយ ប៉ុន្តែគេព្យាករណ៍ថា នៅពេលសន្ធិសញ្ញានេះដំណើរការហើយនោះ ការផ្លាស់ប្ដូរមួយចំនួនអាចនឹងងាកមកធ្វើតាមផ្លូវទឹកជំនួសវិញ។

លោក លីអ៊ីវេន ហ្គីវិច ( Lieven Geerinck ) ទីប្រឹក្សាបច្ចេកទេសរបស់គណៈកម្មាធិការទន្លេមេគង្គបានឲ្យដឹងថា កន្លងមកការដឹកជញ្ជូនតាមផ្លូវទឹកបានត្រូវគេអនុវត្តមិនជា ខ្ជាប់ខ្ជួនទេ ប៉ុន្តែចាប់ពីពេលនេះតទៅ ក្រុមហ៊ុនដឹកជញ្ជូនទាំងអស់អាចរៀបផែនការប្រកបដោយទំនុកចិត្តបាន។

ពាក់ព័ន្ធជាមួយនឹងបញ្ហាដឹកជញ្ជូននេះ លោក ហ៊ី ប៉ាវី អគ្គនាយកកំពង់ផែអន្តរជាតិភ្នំពេញ បានឲ្យដឹងថា សន្ធិសញ្ញានេះនឹងនាំមកនូវកំណើនសេដ្ឋកិច្ចដល់កម្ពុជា និងក៏ដូចជានាំយកនូវការអភិវឌ្ឍន៍កំពង់ផែភ្នំពេញផ្ទាល់។

លោក បានបញ្ជាក់ថា «នៅពេលនេះយើងដឹងអំពីសក្ដានុពលដ៏ពេញទំហឹងរបស់ទន្លេមេគង្គតាមរយៈ ការដឹកជញ្ជូនទំនិញចេញទៅអាមេរិក អឺរ៉ុប និង អូស្ត្រាលីតាមកំពង់ផែកៃម៉ែបនៅវៀតណាម»។

ក្រៅពីចំណេញដល់ផលប្រយោជន៍ជាតិហើយនោះ គណៈកម្មាធិការទន្លេមេគង្គក៏បានអះអាងថាគម្រោងនេះក៏ធ្វើឲ្យចំណេញ ដល់បរិស្ថានផងដែរ។

សេចក្ដីប្រកាសព័ត៌មានខាងលើបានបញ្ជាក់ថា ការកែលំអហេដ្ឋារចនាសម្ព័ន្ធដឹកជញ្ជូនតាមដងទន្លេនឹងជួយកាត់បន្ថយ ការបំផាយរបស់ឧស្ម័នផ្ទះកញ្ចក់បានតែមួយផ្នែក ។

ប្រភពនោះបានបញ្ជាក់ថា«ការដឹកជញ្ជូនតាមរយៈទន្លេអាចបញ្ចេញ ឧស្ម័នផ្ទះកញ្ចក់ដែលកើតឡើងដោយសារតែការបំផាយឧស្ម័នការបូនិចមួយ តោនដែលកើតពីការដឹកជញ្ជូនតាមផ្លូវគោកគីឡូម៉ែត្រ» ។