ភ្នំពេញ៖ ក្រសួងព័ត៌មាន បានព្រមានដល់ស្ថានីយវិទ្យុ និងទូរទស្សន៍ឲ្យផ្ដោតការចាប់អារម្មណ៍ទៅលើការចាក់ផ្សាយស្ប៉ត ពាណិជ្ជកម្មដែលនាំមកពីបរទេស និងស្ប៉តពាណិជ្ជកម្មផ្សេងៗទៀតដែលមានលក្ខណៈភូតកុហក បោកប្រាស់ បំផ្លើសខុសពីការពិត និងនាំឲ្យប៉ះពាល់ដល់សុខភាព អាយុជីវិត និងជះឥទ្ធិលមិនល្អដល់សង្គមខ្មែរ។
ការព្រមាននេះ ត្រូវបានធ្វើឡើងតាមលិខិតមួយចុះថ្ងៃទី២ ខែកុម្ភៈ ឆ្នាំ២០១០ ដែលចុះហត្ថលេខាដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។
លិខិតនោះបានលើកឡើងថា កន្លងមកក្រសួងព័ត៌មានសង្កេតឃើញថា គ្រប់ស្ថានីយវិទ្យុ និងទូរទស្សន៍ទាំងអស់បានចាក់ផ្សាយស្ប៉តពាណិជ្ជកម្មអំពីផលិតផល សេវាកម្មផ្សេងៗដែលជាផលិតផលនៅក្នុងស្រុក និងនាំមកពីបរទេស។ ចំណុចដែលគប្បីចាប់អារម្មណ៍នោះ គឺការចាក់ផ្សាយស្ប៉តពាណិជ្ជកម្មសម្អាង ឧបករណ៍ សម្ភារៈកីឡា និងផលិតផលផ្សេងៗទៀតដែលនាំចូលពីបរទេស ហើយប្រើស្ប៉តរបស់បណ្ដាប្រទេសទាំងនោះផ្សាយពាណិជ្ជកម្ម ដោយមកប្រែជាភាសាខ្មែរដែលមានតួសម្ដែងជាជនបរទេស។
ក្រសួងព័ត៌មាន ក៏បានទាញការយកចិត្តទុកដាក់របស់លោក-លោកស្រី ប្រធានស្ថានីយវិទ្យុ-ទូរទស្សន៍ទាំងអស់ថា ដើម្បីរួមចំណែកលើកតម្កើងអត្ដសញ្ញាណនិងកិត្តិយសជាតិខ្មែរ ព្រមទាំងបង្កើនការងារជូនសិល្បករ សិល្បការិនីខ្មែរនោះ គ្រប់ស្ថានីយទាំងអស់គប្បីសហការជាមួយក្រុមហ៊ុនផលិតស្ប៉តពាណិជ្ជកម្ម ក្នុងស្រុក ហើយជ្រើសរើសតួសម្ដែងជាសិល្បករ សិល្បការិនីខ្មែរយកមកចាក់ផ្សាយវិញ។ ម្យ៉ាងទៀតចំពោះស្ប៉តផ្សាយពាណិជ្ជកម្មផលិតផលនានា ដែលបកប្រែពីភាសាបរទេស គឺត្រូវតែគោរពឲ្យបាននូវគោលការណ៍ដោយសរសេរអក្សរបរទេសនៅពីក្រោម និងមានទំហំតូចជាងអក្សរខ្មែររួមទាំងពាណិជ្ជនាម (Trade Mark) និងសេវានាម (Service Mark) ផងដែរ។ ជាមួយនេះខិតខំចៀសវាងការចាក់ផ្សាយស្ប៉តពាណិជ្ជកម្មគ្រឿងស្រវឹងដែល បង្ហាញអំពីការផ្ដល់រង្វាន់មានលក្ខណៈឃោសនាអូសទាញ ធ្វើឲ្យប្រជាពលរដ្ឋ ជាពិសេសយុវជនយុវនារីឈ្លក់វង្វេងសេពគ្រឿងស្រវឹង និងការផ្សាយពាណិជ្ជកម្មមានលក្ខណៈភូតកុហកបោកប្រាស់ បំផ្លើសពីការពិត ធ្វើឲ្យមានការភ័ន្តច្រឡំអំពីគុណភាព សុវត្ថិភាព ដែលនាំឲ្យប៉ះពាល់ដល់សុខភាពអាយុជីវិត និងជះឥទ្ធិពលដល់សង្គមខ្មែរ ហើយផ្ទុយពីច្បាប់ស្ដីពីរបបសារព័ត៌មានដែលបានចែង៕
Techno Charity is a charitable organization created in 2006 by engineers graduated from the Institute of Technology of Cambodia.
Recent Comments