ក្រុមហ៊ុនអាកាសចរណ៍អង្គរអ៊ែរ ទើបទិញយន្ដហោះថ្មី១គ្រឿង

ក្រុមហ៊ុនអាកាសចរណ៍ថ្មីរបស់ប្រទេសកម្ពុជាដែលមានឈ្មោះថា អង្គរអ៊ែរ(CAA) បានទិញយន្តហោះ ជាលើកដំបូងរបស់ខ្លួនពីបរទេសហើយយន្ដហោះនេះកំពុងហោះហើរពីក្រុងភ្នំពេញទៅខេត្តសៀមរាប។

លោក សយ សុកាន់ អនុរដ្ឋលេខាធិកានៃអគ្គលេខាធិការដ្ឋានអាកាសចរណ៍ស៊ីវិលកម្ពុជាដែលមើលការខុសត្រូវលើកិច្ចការនេះបានប្រាប់ទៅកាសែតក្រុមហ៊ុនអង្គរអ៊ែរ បានទិញយន្តហោះថ្មីធុន ATR-72ដែលផលិតដោយក្រុមហ៊ុនរួមមួយរបស់បារាំងនិងអ៊ីតាលី។ យន្ដហោះថ្មីនេះបានទទួលសញ្ញាប័ត្រអនុញ្ញាតឲ្យមានប្រតិបត្ដិការពីរដ្ឋាភិបាល កាលពីសប្ដាហ៍មុន។

អង្គរអ៊ែរ បានចាប់ផ្ដើមឡើងកាលពីខែកក្កដាឆ្នាំមុន ហើយជាក្រុមហ៊ុនរួមរវាងរដ្ឋាភិបាលកម្ពុជាដែលមានភាគហ៊ុន ៥១% និងក្រុមហ៊ុនអាកាសចរណ៍វៀតណាមមានភាគហ៊ុន ៤៩%។

ចាប់តាំងពីក្រុមហ៊ុនអង្គរអ៊ែរបានចាប់ផ្ដើមការរកស៊ីរបស់ខ្លួន ក្រុមហ៊ុនបានជួលយន្ដហោះធុន ATR-72 និងធុន Airbus A-320 ពីក្រុមហ៊ុនវៀតណាមដែលជាដៃគូរបស់ខ្លួន។ លោក សយ សុកាន់ មានប្រសាសន៍ថា យន្ដហោះទើបទិញថ្មីនេះ នឹងត្រូវប្រើដើម្បីជំនួសឲ្យយន្ដហោះដែលបានជួលកន្លងទៅនេះ៕