ក្រុមអ្នកទទួលរង្វាន់ណូបែលសន្តិភាព ៩រូបមកកាន់ប្រទេសកម្ពុជាក្នុងកម្មវិធី “ស្ពាន: កិច្ចសន្ទនាដើម្បីវប្បធម៌សន្តិភាព”

ភ្នំពេញ៖ ក្រុមអ្នកទទួលបានរង្វាន់ណូបែលសន្តិភាព ចំនួន៩រូបនឹងមកកាន់ប្រទេសកម្ពុជាជាបន្តបន្ទាប់ដើម្បីចូលរួម ក្នុងកម្មវិធី “ស្ពាន: កិច្ចសន្ទនាដើម្បីវប្បធម៌សន្តិភាព” ដើម្បីធ្វើបាឋកថាជូនដល់និស្សិត និងសាធារណជនខ្មែរ ដើម្បីបានជាគុណប្រយោជន៍ដល់ការថែរក្សា និងការពូនជ្រុំសន្តិភាពក៏ដូចជាការលើកស្ទួយភាពសុខដុមរមនា ការអភិវឌ្ឍន៍ និងការកាត់បន្ថយភាពក្រីក្រនៅកម្ពុជា។ កម្មវិធីនេះបានរៀបចំឡើងដោយមូលនិធិសន្តិភាពអន្តរជាតិ និងសកលវិទ្យាល័យកម្ពុជា។

លោកបណ្ឌិត កៅ គឹមហួន ប្រធានសាកលវិទ្យាល័យកម្ពុជា បានថ្លែងឲ្យដឹងនៅក្នុងពិធីបើកគម្រោងកម្មវិធី “ស្ពាន: កិច្ចសន្ទនាដើម្បីវប្បធម៌សន្តិភាព” និងពិធីប្រគល់សញ្ញាបត្របណ្ឌិតកិត្តិយស ផ្នែកវិទ្យាសាស្ត្រ ជូនលោកសាស្ត្រាចារ្យ (Aaron J.Ciechanover) អ្នកប្រាជ្ញរង្វាន់ណូបែលសន្តិភាព ឆ្នាំ២០០៤ ដែលប្រព្រឹត្តធ្វើកាលពីល្ងាចថ្ងៃទី៥ ខែវិច្ឆិកា ឆ្នាំ២០០៩ នៅសកលវិទ្យាល័យកម្ពុជាក្រោមអធិបតីភាពរបស់លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ថា នៅក្នុងរយៈពេល៦ខែពោល គឺចាប់ពីខែវិច្ឆិកា២០០៩ ដល់ខែមេសា២០១០ គម្រោង “ស្ពាន: កិច្ចសន្ទនាដើម្បីវប្បធម៌សន្តិភាព” នឹងអញ្ជើញអ្នកប្រាជ្ញដែលបានទទួលរង្វាន់ណូបែលសន្តិភាព និងសិល្បករពិភពលោកដែលមានស្នាដៃល្បីល្បាញ លើវិស័យភាពយន្ត និងតន្ត្រីព្យ៉ាណូ មកធ្វើបាឋកថា ជូនដល់និស្សិត និងសាធារណជនខ្មែរ។ អ្នកលំដាប់ថ្នាក់ពិភពលោកទាំងនោះ មានចំនួន៩រូបដែលនឹងមកដល់កម្ពុជាជាបន្តបន្ទាប់ ដែលក្នុងនោះរួមមាន លោកសាស្ត្រាចារ្យ (AaronJ.Ciechanover) អ្នកប្រាជ្ញរង្វាន់ណូបែលសន្តិភាពឆ្នាំ២០០៤។ លោកសាស្ត្រាចារ្យ នឹងធ្វើបាឋកថាមួយស្ដីពី “វិទ្យាសាស្ត្រ និងបច្ចេកទេស ប្រៀបដូចជាភាសានៃប្រលោមលោក សន្តិភាពមួយ”។

លោក (Jackie Chan) ហៅ ឈិន ឡុង ដែលជាតារាភាពយន្ត ហុងកុង និងហូលីវូដ ដ៏ល្បីល្បាញ នឹងអញ្ជើញមកចូលរួមក្នុងកម្មវិធី “ស្ពាន: កិច្ចសន្ទនាដើម្បីវប្បធម៌សន្តិភាព” នៅប្រទេសកម្ពុជា ពីថ្ងៃទី៨ ដល់ថ្ងៃទី១២ វិច្ឆិកា ឆ្នាំ២០០៩។ លោក (Jackic Chan) និងធ្វើបាឋកថា មួយនៅសកលវិទ្យាល័យកម្ពុជាស្ដីពី “សិល្បៈ និងវប្បធម៌ ជាមាគ៌ាឆ្ពោះ ទៅសន្តិភាព” និងសម្ដែងជាមួយសិល្បករ-សិល្បការិនីខ្មែរផ្សាយបន្តផ្ទាល់តាម ស្ថានីយទូរទស្សន៍អាស៊ីអាគ្នេយ៍ នៅល្ងាចថ្ងៃទី១០ ខែវិច្ឆិកា ឆ្នាំ២០០៩ នៅវេលាម៉ោង៤ល្ងាច។

លោក (Oliver Stone) អ្នកដឹកនាំភាពយន្ត-អ្នកនិពន្ធ និងជាផលិតករសិល្បៈភាពយន្តអាមេរិកដ៏ល្បីល្បាញ នឹងអញ្ជើញមកពីថ្ងៃទី១៤ និងស្នាក់នៅកម្ពុជា រហូតដល់ថ្ងៃទី២១ ខែវិច្ឆិកា ឆ្នាំ២០០៩។ លោកនឹងធ្វើបាឋកថាមួយស្ដីពី “ការផលិតភាពយន្ត និងការស្ថាបនាសន្តិភាព”។

លោកសាស្ត្រាចារ្យ (David J.Gross) គឺជាអ្នកប្រាជ្ញ ដែលបានទទួលរង្វាន់ណូបែលសន្តិភាព ផ្នែករូបវិទ្យាឆ្នាំ២០០៤។ លោកសាស្ត្រាចារ្យក៏ នឹងហើយនឹងធ្វើបាឋកថាមួយស្ដីពី “អនាគតនៃវិទ្យាសាស្ត្រ និងការអភិវឌ្ឍន៍មនុស្ស”។

លោកសាស្ត្រាចារ្យ (Eric S.Maskin) ជាសេដ្ឋ វិទូអាមេរិកាំងដែលបានទទួលរង្វាន់ណូបែលសន្តិភាព ផ្នែកសេដ្ឋកិច្ចនៅឆ្នាំ២០០៧។ លោកនឹងអញ្ជើញមកដល់កម្ពុជា នៅថ្ងៃទី១៦ និងស្នាក់នៅរហូតដល់ថ្ងៃទី២៦ ខែមករា ឆ្នាំ២០១០ ដើម្បីធ្វើបាឋកថាមួយស្ដីពី “ការកាត់បន្ថយអសមភាព ក្នុងទីផ្សារពិភពលោក”។

លោកសាស្ត្រាចារ្យ (TorestenN.Wiesel) បានទទួលរង្វាន់ណូបែលសន្តិភាពផ្នែកឱសថសាស្ត្រ នៅសកលវិទ្យាល័យ (Rockfeller) ទីក្រុង New York ពីឆ្នាំ១៩៨១។ លោកនឹងអញ្ជើញមកកម្ពុជានៅថ្ងៃទី១៤ ខែមករា រហូតដល់ថ្ងៃទី១៣ ខែកុម្ភៈ ឆ្នាំ២០១០ ដើម្បីធ្វើបាឋកថាមួយស្ដីពី “វិទ្យាសាស្ត្រដើម្បីសន្តិភាព “នៅសកលវិទ្យាល័យកម្ពុជា។

សិល្បករតន្ត្រីព្យ៉ាណូដ៏ល្បីល្បាញនៃទីក្រុងឡុងដ៍ឈ្មោះ Vladimir Ashkenazy នឹងអញ្ជើញមកនៅថ្ងៃទី៧ មីនា ហើយស្នាក់នៅកម្ពុជារហូតដល់ថ្ងៃទី១២ ខែមិនា ២០១០។ លោកនឹងរៀបចំប្រគំតន្ត្រីមួយដើម្បីវប្បធម៌សន្តិភាព នៅសាលសន្និសីទចតុមុខ នៅល្ងាចថ្ងៃទី៩ ខែមីនា ឆ្នាំ២០១០។

លោកសាស្ត្រាចារ្យ Francoise Barre-Siinoussi ដែលបានទទួលរង្វាន់ណូបែលសន្តិភាព ផ្នែកឱសថសាស្ត្រនៅវិទ្យាស្ថាន Paster-Paris នឹងអញ្ជើញមកដល់ថ្ងៃទី៣ និងស្នាក់នៅរហូតដល់ថ្ងៃទី១៥ ខែមេសា ឆ្នាំ២០១០។ លោក Francoise និងធ្វើបាឋកថា មួយស្ដីពី “បញ្ហាប្រឈមមុខទៅអនាគតក្នុងការការពារ និងព្យាបាលជំងឺហ៊ីវ និងមេរោគអេដស៍”។

ហើយចុងក្រោយ គឺលោកបណ្ឌិត Jose Ramos-Horta ជាប្រធានាធិបតីនៃប្រទេសទីម័រខាងកើត ដែលបានទទួលរង្វាន់ណូបែលសន្តិភាព ឆ្នាំ១៩៩៦ នឹងអញ្ជើញមកដល់ នៅថ្ងៃទី២០មេសា ហើយនឹងស្នាក់នៅកម្ពុជារហូតដល់ថ្ងៃទី២៧ ខែមេសា ឆ្នាំ២០១០។ លោកក៏នឹងធ្វើបាឋកថា ស្ដីពី “ការស្ថាបនាវប្បធម៌សន្តិភាព និងការអភិវឌ្ឍន៍ក្នុងពិភពលោកសកលភាវូបនីយកម្ម”។

អ្នកទាំង៨រូប នឹងទទួលបានសញ្ញាប័ត្របណ្ឌិតកិត្តិយស ពីសកលវិទ្យាល័យកម្ពុជា លើកលែងតែសិល្បករតន្ត្រីព្យ៉ាណូដ៏ល្បីល្បាញ នៃទីក្រុងឡុងដ៍ឈ្មោះ Vladimir Ashkenazy មួយចេញ។

លោក សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានមានប្រសាសន៍ថា ជាការពិតណាស់ ការរៀបចំកម្មវិធីក្នុងលក្ខណៈជាព្រឹត្តិការណ៍បន្តបន្ទាប់គ្នា រយៈពេល៦ខែនេះ គឺពិតជាផ្ដល់ឱកាសបើកទូលាយ ដល់ការផ្លាស់ប្ដូរមតិយោបល់ និងបទពិសោធន៍ ជាពិសេសពីវាគ្មិនល្បីៗ ដូចជាម្ចាស់ពានរង្វាន់ណូបែល និងសិល្បករល្បីៗនៅក្នុងពិភពលោក លើប្រធានបទស្ដីពីការកសាងវប្បធម៌ សន្តិភាព និងការអភិវឌ្ឍន៍នៅក្នុងបរិបទនៃសកលភាវូបនីយកម្ម ព្រមទាំងប្រធានបទផ្សេងៗទៀត ជាអាទិ៍ ប្រធានបទទាក់ទង នឹងនយោបាយ សេដ្ឋកិច្ច វិទ្យាសាស្ត្រ និងវប្បធម៌ ដែលកំពុងមានឥទ្ធិពលលើកិច្ចសហប្រតិបត្តិការអន្តរជាតិ ដើម្បីបុព្វហេតុ សុខសន្តិភាព សេរីភាព និងការអភិវឌ្ឍន៍។

លោកឧបនាយករដ្ឋមន្ត្រី បានបង្ហាញជំនឿថា ពិធីដែលកំពុងប្រព្រឹត្តនាពេលនេះ គឺពិតជាមានសារៈសំខាន់ក្នុងការផ្សារភ្ជាប់នូវទំនាក់ទំនង និងជំរុញការយល់ដឹងអំពីគ្នា និងបង្កើតជំនឿទុកចិត្តរវាងគ្នា សំដៅពង្រឹង វប្បធម៌ សន្តិភាព និងការអភិវឌ្ឍន៍ សេដ្ឋកិច្ច និងសង្គមក្នុងតំបន់ ក៏ដូចជាលើពិភពលោកផងដែរ។ ហើយគម្រោងនេះពិតជាមានផលប្រយោជន៍ដល់ការផ្សព្វផ្សាយ និងផ្ទេរចំណេះដឹងថ្មីៗពីអ្នកទទួលបានរង្វាន់ណូបែលសន្តិភាព និងឥស្សរជន ពិភពលោក ទាំង៩រូប ក្នុងរយៈពេល៦ខែនេះ ដល់និស្សិត និងអ្នកស្រាវជ្រាវកម្ពុជា៕

From: http://www.women.open.org.kh/