អតីតប្រធានាធិបតីសហរដ្ឋអាមេរិក លោក ជីមី ខាតធ័រ (Jimmy Carter) ព្រមទាំងលោក សុខ អាន ឧបនាយករដ្ឋមន្រ្តីនិងជារដ្ឋមន្រ្តីនៃទីស្តីការគណៈរដ្ឋមន្រ្តី នៅថៃ្ង២១ វិច្ឆិកានេះ បានសម្ពោធដាក់ឲ្យប្រើប្រាស់ផ្ទះសម្បែងចំនួន២១ខ្នងនៃគម្រោងការ សាងសង់ផ្ទះចំនួន៦០០ខ្នងដែលសាងសង់រួចហើយជូនពលរដ្ឋខែ្មរក្រីក្រ ចំនួនជាង១ពាន់គ្រួសារ។
ពិធីសម្ពោធនេះបានធ្វើទ្បើងនៅក្នុងឃុំភ្នំបាត ស្រុកពញាឮ ខេត្តកណ្តាល ដែលមានប្រជាពលរដ្ឋខ្មែរ ក្រុមអ្នកស្ម័គ្រចិត្តរបស់អង្គការ និងមន្រ្តីរដ្ឋាភិបាលកម្ពុជា ចូលរួមជាច្រើនរយនាក់។
លោក ជីមី ខាតធ័រ គឺជាអតីតប្រធានាធិបតីសហរដ្ឋអាមេរិកនៅចន្លោះឆ្នាំ១៩៧៦និងឆ្នាំ ១៩៨០ និងជាអ្នកទទួលជ័យលាភីរង្វាន់ណូបែលសន្តិភាពផងដែរនោះ បានមានប្រសាសន៍ទៅកាន់ប្រជាពលរដ្ឋខែ្មរជាច្រើនរយនាក់នៅក្នុង ពិធីសម្ពោធនោះថា ៖ “ជាបឋមសូមស្វាគមន៍ចំពោះអ្នកស្ម័គ្រចិត្ត ទាំងអស់ដែលបានសាងសង់ផ្ទះដ៏ស្រស់ស្អាតនេះផងដែរ។ អ្នកស្ម័គ្រចិត្តទាំងអស់សូមងើបឡើង នេះគឺជាការបង្ហាញមួយនៃភាពដឹកនាំរបស់រាជរដ្ឋាភិបាលកម្ពុជា”។
នៅក្នុងពិធីសម្ពោធនោះដែរ លោក សុខ អាន ជាឧបនាយករដ្ឋមន្រ្តី និងជារដ្ឋមន្រ្តីនៃទីស្តីការគណៈរដ្ឋមន្រ្តី ប្រទេសកម្ពុជា បានមានប្រសាសន៍ថា គម្រោងការសាងសង់ផ្ទះរបស់អង្គការលំនៅឋានដើម្បីមនុស្សជាតិនេះ គឺមានសារសំខាន់ក្នុងការលើកកម្ពស់ជីវភាពរបស់ប្រជាពលរដ្ឋក្រីក្រនៅ ក្នុងប្រទេសកម្ពុជា។
លោក សុខ អាន បានមានប្រសាសន៍ថា ៖ «ម៉្យាងទៀតយើងខ្ញុំក៏យល់ ច្បាស់ថា វត្តមានរបស់ឯកឧត្ដម ជីមី ខាតធ័រ និងលោកជំទាវនៅកម្ពុជានាឱកាសនេះ គឺជាជំហានមួយក្នុងការពង្រីកពង្រឹងទំនាក់ទំនងមិត្តភាព សហប្រតិបត្តិការនិងមនោសញ្ចេតនាជ្រាលជ្រៅរវាងកម្ពុជានិងសហរដ្ឋ អាមេរិកដែរ»។
ប្រជាពលរដ្ឋម្នាក់នៅក្នុងចំណោមប្រជាពលរដ្ឋចំនួន២១គ្រួសារនៃ សហគមន៍ជីវិតថ្មី ដែលជាគ្រួសារក្រីក្ររស់នៅពឹងផ្អែកលើការកាយនិងរើសសំរាមនៅ ស្ទឹងមានជ័យកន្លងមក ហើយបានទទួលផ្ទះមួយខ្នងពីអង្គការលំនៅឋានដើម្បីមនុស្សជាតិ បានថែ្លងថា លោកមានការរីករាយដែលលោកមិននឹកស្មានដល់។
ពលរដ្ឋដដែលបានបញ្ជាក់ថា ៖ «ចំពោះរូបខ្ញុំផ្ទាល់ ផ្ទះខ្ញុំមាន(សមាជិក)ច្រើន សមាជិករួមទាំងអស់៩នាក់។ មានអារម្មណ៍សប្បាយ ដូចថាអ្វីដែលជាតម្រូវការសម្រាប់ឆាកជីវិតពួកខ្ញុំនេះ ថ្ងៃនេះជាថ្ងៃទទួលជោគជ័យនៃក្ដីស្រមៃរបស់ពួកខ្ញុំ។ មានអារម្មណ៍សប្បាយមែនទែន»។
អង្គការដដែលនេះមានគម្រោងការសាងសង់លំនៅឋានឲ្យបានចំនួន៦ពាន់ ខ្នងនៅក្នុងរយៈពេល៥ឆ្នាំទៀតនៅក្នុងប្រទេសកម្ពុជា ក្នុងនោះលំនៅឋានចំនួន៥ម៉ឺនខ្នងដែលអង្គការដដែលនេះមានគម្រោងការ សាងសង់នៅក្នុងរយៈពេល៥ឆ្នាំខាងមុខនេះសម្រាប់ឲ្យគ្រួសារក្រីក្រ នៅក្នុងបណ្តាប្រទេសនៅតាមដីសណ្ដទន្លេមេគង្គ មានដូចជាប្រទេសកម្ពុជា វៀតណាម លាវ ថៃ និងចិនជាដើម ក្រោមកិច្ចទ្រទ្រង់ថវិកាដោយលោក ជីមី ខាតធ័រ នោះ៕
From: http://www.rfa.org/khmer/indepth/inauguration-of-houses-4poor-people-11212009073213.html
Techno Charity is a charitable organization created in 2006 by engineers graduated from the Institute of Technology of Cambodia.
Recent Comments Gravatars