កម្ពុជាបានបញ្ចប់ការសាកល្បងបន្សាបគ្រឿងញៀនចំពោះអ្នកញៀន ថ្នាំញៀនដែលយកថ្នាំមកពីប្រទេសវៀតណាម មានលក្ខណៈជាថ្នាំទឹកបុរាណដោយប្រកាសថា ការពិសោធនេះបានជោគជ័យ តែក្រុមសិទ្ធមនុស្សរិៈគន់ថា ថ្នាំនេះមិនមានលក្ខណៈវិទ្យាសាស្ត្រ ទុកចិត្តមិនបាន។
មន្រ្តីជាន់ខ្ពស់នៃអាជា្ញធរជាតិ ប្រយុទ្ធប្រឆាំងគ្រឿងញៀនក្នុងប្រទេសកម្ពុជា និងក្រុមមន្រ្តីជំនាញការវៀតណាមខាងបន្សាបគ្រឿងញៀននៅថៃ្ងចន្ទ័ ទី២១ ខែធ្នូនេះ បានបញ្ចប់ការសាកល្បង ឬពិសោធថ្នាំម្យ៉ាងរបស់វៀតណាមក្នុងការព្យាបាល និងបន្សាបអ្នកញៀនគ្រឿងញៀនចំនួន ២១នាក់រយៈពេល ១០ថៃ្ង នៅក្នុងមជ្ឈមណ្ឌល “ឱកាសខ្ញុំ” នៅជាយទីក្រុងភ្នំពេញនោះហើយ។
ការបញ្ឈប់ការសាកល្បងដោយជោគជ័យនេះបានធ្វើទ្បើងនៅគ្រាដែលមាន ការចោទប្រកាន់ពីអង្គការឃ្លាំមើលសិទ្ធិមនុស្ស Human Rights Watch ថាថ្នាំបន្សាបនោះគ្មានបទដ្ឋានវិទ្យាសាស្រ្តត្រឹមត្រូវ។
លោក មឹក ដារ៉ា នាយកមន្ទីប្រឆាំងគ្រឿងញៀននៃអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀនប្រទេសកម្ពុជាបានមានប្រសាសន៍ប្រាប់វិទ្យុ អាស៊ីសេរីនៅក្នុងមជ្ឈមណ្ឌលឱកាសខ្ញុំនោះថា ការសាកល្បងបន្សាប និងព្យាបាលអ្នកញៀនគ្រឿងញៀន ហេរ៉ូអ៊ីន បានទទួលជោគជ័យ។
លោក បានបន្តរថា ៖ «ថ្នាំនេះមិនមែនទើបរកឃើញម្សិលមិញហើយយក មកពិសោធសាកឯណា។ ថ្នាំផ្កាឈូកនេះអ្នកវិទ្យាសាស្ត្រប្រទេសវៀតណាមលោករកឃើញ ហើយបានប្រើប្រាស់ទៅលើអ្នកដែលញៀននៅប្រទេសវៀតណាមប៉ុន្នានឆ្នាំមក ហើយ ហើយត្រូវបានរដ្ឋាភិបាលវៀតណាមលោកទទួលស្គាល់។ តែដោយសារតែភាគីកម្ពុជាយើងមិនទាន់មានបទពិសោធន៍ក្នុងការ ប្រើប្រាស់ឱសថហ្នឹង ទើបបានជាអាជ្ញាធរជាតិបានស្នើសុំឲ្យខាងភាគីមិត្តវៀតណាមបញ្ជូន វេជ្ជបណ្ឌិតលោកមានវិជ្ជាជីវៈច្បាស់លាស់ឲ្យមកផ្ទេរចំណេះដឹងមក វេជ្ជបណ្ឌិតកម្ពុជាយើង»។
ជនជាតិវៀតណាមម្នាក់ឈ្មោះ ហ្វាម មីនគឿង នៅក្នុងចំណោមអ្នកញៀនគ្រឿងញៀនហេរ៉ូអ៊ីន ចំនួន ២១នាក់នោះបានថែ្លងថា ការបន្សាបដំបូងធ្វើទុក្ខនៅក្នុងខ្លួន ប៉ុន្តែក្រោយមកមិនជាអ្វីទេដោយបានបញ្ជាក់ដូច្នេះ ៖ «មុនដំបូង ធ្វើទុក្ខតែមួយថ្ងៃទេ វាធ្វើឲ្យរាគផង ឲ្យទន់ដៃទន់ជើងក្អួតតិចតួច ដល់ថ្ងៃទី២ អត់អីទេ។ បីថ្ងៃក្រោយមកបងប្អូនយើងហូបចុកបានទាំងអស់អ្នកណាក៏មាន កម្លាំង ហើយ ៤ ទៅ ៥ថ្ងៃក្រោយនេះគេពិនិត្យទឹកនោមអត់មានឃើញអីទេ»។
យុវជនខែ្មរម្នាក់ឈ្មោះ ហ៊ុន ភ័គ្គ អាយុ ២២ឆ្នាំ មកពីខែត្រព្រៃវែង បានមកទទួលការបន្សាបការញៀនគ្រឿងញៀនហេរ៉ូអ៊ីនចំនួន ១០ថៃ្ងនៅក្នុងមជ្ឈមណ្ឌលឱកាសខ្ញុំនោះ បានបញ្ជាក់ថា ការសាកល្បងនេះបានជោគជ័យមិនឲ្យញៀនគ្រឿងញៀននោះទៀត។
ហ៊ុន សុភ័គ្គ បញ្ជាក់ថា ៖ «ខ្ញុំមកពិសោធថ្នាំមែន អត់មានធ្វើទុក្ខអីផង ហូបថ្នាំហ្នឹងគ្រាន់តែធ្វើទុក្ខក្តៅបន្តិច»។ សុខ សេរី៖ ឥឡូវសប្បាយចិត្តទេ? ហ៊ុន សុភ័គ្គ ៖ សប្បាយ!ព្រោះជាហើយ។
លោកឧត្តមសេនីយ៍ នាក់ យុទ្ធា ជាប្រធាននាយកដ្ឋាននីតិកម្ម និងអប់រំ ស្តានីតិសម្បទានៃអាជ្ញាធរជាតិប្រយុទ្ធប្រឆាំងគ្រឿងញៀននោះបានមាន ប្រសាសន៍ថា អ្នកញៀងគ្រឿងញៀន ហេរ៉ូអ៊ីនចំនួន ២១នាក់ ដែលបានទទួលជោគជ័យបន្សាប ឬផ្តាច់ការញៀននោះនឹងត្រូវឲ្យវិលទៅផ្ទះវិញនៅថៃ្ងច័ន្ទនេះ ក្រោយពីបានទទួលការបន្សាបចំនួន ១០ថៃ្ងមក។
លោកបានបន្តរថា ៖ «ក្រោយពីការបន្សាបរយៈពេល ១០ថ្ងៃនេះទៅ ល្ងាចនេះយើងនឹងដឹកគាត់ដាក់តាមគោលដៅលំនៅដ្ឋានរបស់គាត់វិញ ហើយយើងនឹងមានក្រុមតាមដាន ហើយក្រុមតាមដានហ្នឹងគឺជាគ្រូអនុវត្តគម្រោងរបស់យើង ឲ្យគាត់តាមដានមើលថា តើគាត់ស្ថិតនៅក្នុងភាពប្រក្រតីដូចនៅក្នុងមណ្ឌល ឬលាប់ឡើងវិញ ឬក៏គាត់វិលទៅប្រើប្រាស់ថ្នាំញៀនវិញដោយសារគាត់ជួបមជ្ឍដ្ឋាន ចាស់»។
មជ្ឈមណ្ឌលឱកាសខ្ញុំនោះ មានទីតាំងស្ថិតនៅក្នុងខណ្ឌសែនសុខ ចម្ងាយប្រមាណជិត ២០គម ខាងជើងទីក្រុងភ្នំពេញ ដែលមានអ្នកញៀងគ្រឿងញៀនចំនួនជាង ២០០នាក់ កំពុងតែទទួលការអប់រំ និងបន្សាបការញៀនគ្រឿងញៀន ប៉ុន្តែអ្នកញៀនគ្រឿងញៀនហេរ៉ូអ៊ីនចំនួន ២១នាក់ប៉ុណ្ណោះបានឆ្លងកាត់ការសាកល្បងបន្សាប ឬផ្តាច់ការញៀននោះក្នុងរយៈពេល ១០ថៃ្ងនេះ។
កាលពីពេលថ្មីៗនេះរដ្ឋាភិបាលប្រទេសវៀតណាមបានផ្តល់មកឲ្យ រដ្ឋាភិបាលកម្ពុជានូវថ្នាំបុរាណ ចំនួន ២២កែស និងគ្រូពេទ្យវៀតណាមចំនួន ១០នាក់មកប្រទេសកម្ពុជាដើម្បីបន្សាបអ្នកញៀនគ្រឿងញៀនហេរ៉ូអ៊ីន ចំនួន ២១នាក់។
ថ្នាំបុរាណវៀតណាមនោះមានឈ្មោះថា “បង់សែន” ឬថ្នាំ “ផ្កាឈូក” ជាថ្នាំទឹកដូចដបស្រាបានរកឃើញនិងផលិតដោយជនជាតិវៀតណាមម្នាក់ ឈ្មោះ លីវ ហ្វាំងសៀម។
អង្គការឃ្លាំមើលសិទ្ធិមនុស្ស Human Rights Watch បានចោទប្រកាន់ថា ការសាកល្បងនោះបានធ្វើដោយបង្ខំ ប៉ុន្តែក្រុមមន្រ្តីប្រឆាំងគ្រឿងញៀននៃប្រទេសកម្ពុជាបានបដិសេធដោយ បញ្ចាក់ថា វាជាការផ្ទេរចំណេះដឹង និងបទពិសោធពីវៀតណាមមកកម្ពុជាតែប៉ុណ្ណោះ៕
Techno Charity is a charitable organization created in 2006 by engineers graduated from the Institute of Technology of Cambodia.
Recent Comments