យុទ្ធនាការផ្ដល់វ៉ាក់សាំងផ្ដាសាយ A/H1N1នឹងចាប់ផ្តើមនៅខែមិនាខាងមុខនេះ

ទឹកប្រាក់ប្រមាណ ៤លានដុល្លារអាមេរិកនឹងត្រូវចំណាយ សម្រាប់យុទ្ធនាការផ្ដល់វ៉ាក់សាំងផ្ដាសាយថ្មី A/H1N1 ដែលគ្រោងនឹងចាប់ផ្ដើមផ្ដល់ដល់ក្រុមគោលដៅ នៅដើមខែមីនាខាងមុខនេះបន្ទាប់ពីការរង់ចាំដីយូរមក។

លោកសាស្ត្រាចារ្យវេជ្ជបណ្ឌិត សាន់ ច័ន្ទសឿន នាយកកម្មវិធីជាតិផ្ដល់ថ្នាំបង្ការនៃក្រសួងសុខាភិបាល បាននិយាយឲ្យដឹងតាមទូរស័ព្ទ កាលពីល្ងាចថ្ងៃព្រហស្បតិ៍ទី១១ខែកុម្ភៈនេះថា ក្នុងជំហានដំបូងនៃការផ្ដល់វ៉ាក់សាំងជំងឺផ្ដាសាយថ្មី A/H1N1 ថវិកាជំនួយប្រមាណ៤លានដុល្លារនឹងត្រូវប្រើប្រាស់សម្រាប់ យុទ្ធនាការនេះ។ ថវិកានេះជាថវិកាបានមកពីដៃគូអភិវឌ្ឍន៍របស់ក្រសួងសុខាភិបាល និងអង្គការ USAID។

លោកបន្តថា “ថវិកានេះនឹងត្រូវយកទៅប្រើប្រាស់លើការបណ្ដុះបណ្ដាល ការដឹកជញ្ជូន ការអប់រំ ការធ្វើផែនការ និងការធ្វើយុទ្ធនាការ រួមទាំងថ្លៃវ៉ាក់សាំង និងម្ជុលសឺរ៉ាំង”។ ការចំណាយលើការផ្ដល់វ៉ាក់សាំងនេះមានតម្លៃប្រហែល១០ដុល្លារ សម្រាប់មនុស្សម្នាក់។

លោកសាស្ត្រាចារ្យវេជ្ជបណ្ឌិត សាន់ ច័ន្ទសឿន បានបន្តថា ក្រុមមន្ត្រីសុខាភិបាលទូទាំងប្រទេសចំនួនប្រមាណ២០.០០០នាក់នឹងទទួល បានវ៉ាក់សាំងនេះមុនគេបន្ទាប់មកកុមារអាយុពី៦ខែដល់មួយឆ្នាំ ក្រុមស្ត្រីមានផ្ទៃពោះ និងក្រុមអ្នកមានជំងឺសួតរ៉ាំរ៉ៃជាគោលដៅនៃការផ្ដល់វ៉ាក់សាំងដោយ ឥតគិតថ្លៃ និងស្ម័គ្រចិត្តនាពេលខាងមុខនេះ។ លោកបន្តថា ប្រជាជនក្រុមគោលដៅលើខេត្តក្រុង៤នឹងទទួលបាននូវការផ្ដល់ វ៉ាក់សាំងនេះរួមមាន ប្រជាជនក្រុងភ្នំពេញ ខេត្តកណ្ដាល កំពង់ស្ពឺ និងខេត្តកំពង់ឆ្នាំង។

លោកបន្តថា ជាមួយនោះប្រទេសផ្ដល់ជំនួយនឹងផ្ដល់វ៉ាក់សាំងនេះក្នុងជំហានទី២ តាមរយៈអង្គការសុខភាពពិភពលោកចំនួន១.២លានដូស៍បន្ថែមទៀត ដែលគ្រោងនឹងមកដល់នៅខែមេសា ឬឧសភាខាងមុខនេះ។

លោកសាស្ត្រាចារ្យវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ឲ្យដឹងនាល្ងាចថ្ងៃដដែលថា វ៉ាក់សាំងនេះមិនទាន់មកដល់កម្ពុជានៅឡើយទេ ប៉ុន្តែយើងបាននិងកំពុងធ្វើការអប់រំ និងបណ្ដុះបណ្ដាលក្រុមមន្ត្រីសុខាភិបាលឲ្យត្រៀមធ្វើយុទ្ធនាការនេះ នាពេលខាងមុខ។

សំដៅដល់ការរីករាលដាលជំងឺនេះនៅកម្ពុជា លោករដ្ឋមន្ត្រីបានមានប្រសាសន៍ថា “អត្រារីករាលដាលជំងឺនេះមានសភាពធូរស្រាលច្រើនគួរឲ្យកត់សម្គាល់ ដោយសារមានការប្ដេជ្ញាចិត្តពីប្រមុខរដ្ឋាភិបាល និងពីប្រជាជនគ្រប់មជ្ឈដ្ឋាន”។ លោកបន្តដោយព្រមានថា “ប៉ុន្តែទោះជាយ៉ាងណាយើងមិនអាចធ្វេសប្រហែលបានទេ បើយើងធ្វេសប្រហែលនឹងធ្វើឲ្យជំងឺនេះរីករាលដាលឡើងវិញ”៕