នៅក្នុងរឿង Children of Men ដែលចេញបញ្ចាំងតាំងពីឆ្នាំ២០០៦នោះ បានបង្ហាញថាស្ត្រីនៅឆ្នាំ២០២៧នឹងលែងមានកូនដូចសព្វថ្ងៃនេះទៀតឡើយតែគេក៏មិនបានបង្ហាញថាតើមកពីមូលហេតុអ្វីច្បាស់លាស់ដែរ។ ក្នុងរឿងនោះមានតែស្រីក្មេងម្នាក់ប៉ុណ្ណោះដែលមានផ្ទៃពោះនឹងប្រសូតបានកូនស្រីម្នាក់ ដែលត្រូវបានគេជួយជ្រោមជ្រែងរហូតដល់កប៉ាលអ្នកវិទ្យាសាស្រ្តដើម្បីធ្វើការស្រាវជ្រាវជួយសង្គ្រោះអោយមនុស្សមានកូនដូចធម្មតាវិញ។ នេះគ្រាន់តែជាការស្រមៃរបស់អ្នកនិពន្ធតែប៉ុណ្ណោះ។ ប៉ុន្តែតើការស្រមៃនេះអាចនឹងក្លាយទៅជាការពិតដែរឬទេ?
ថ្ងៃនេះ Yahoo បានផ្សាយអត្ថបទមួយមានចំណងជើងថា “ខ្ញុំសំរេចចិត្តថាមិនអោយមានកូន“ (J’ai choisi de ne pas avoir d’enfant)។
« ខ្ញុំអត់ចង់បាន ! » នេះជាសំដីដែលស្តាប់ទៅដូចជានៅតែទើសត្រចៀក និងកំពុងតែចោទជាសំនួរ។ តើសេចក្តីប្រាថ្នាចង់បានកូននេះជាការលះបង់ដ៏ធំធេងណាស់? ទោះជាយ៉ាងណាក៏បច្ចុប្បន្ននេះស្ត្រីដែលមាននិន្នាការមិនចង់ក្លាយជាម្តាយបានកើនឡើងជាលំដាប់៖ ស្ត្រីបារាំង១២% ដែលកើតក្នុងឆ្នាំ១៩៥៤និង១៩៥៥ បានជ្រើសយកជំរើសនេះ។ ចលនានេះបានបង្ហាញរូបរាងកាន់តែច្បាស់នៅអង់គ្លេស និងហូឡង់៖ ក្នុងវ័យដូចគ្នា នេះជាជំរើសរបស់ស្ត្រីម្នាក់ក្នុងចំណោមស្ត្រី៥នាក់។ តើដោយមូលហេតុអ្វីដែលស្ត្រីទាំងនោះបែរជាសំរេចចិត្តដូច្នោះទៅវិញ?
ខ្ញុំចង់ផ្តោតតែទៅលើការងារវិញ
ដោយសារចំណេះដឹងខ្ពស់ដូចបុរស ទើបស្ត្រីអាចក្តោបក្តាប់អនាគតរបស់ខ្លួនដោយខ្លួនឯង និងអាចធ្វើការបាន។ មូលហេតុនេះហើយដែលធ្វើអោយស្ត្រីបដិសេធក្នុងការចិញ្ចឹមកូន។ តួយ៉ាងដូចជាអ្នកស្រី Martine Aubry រដ្ឋមន្ត្រីក្រសួងការងារនិងជាអគ្កលេខាធិការបក្សប្រឆាំងរបស់បារាំង ទទួលស្គាល់ថាគាត់មានកូនតែម្នាក់គត់ដោយសារគាត់ផ្តោតសំខាន់ទៅលើការងារនយោបាយរបស់ខ្លួន។ ចំណែកអ្នកស្រី Nicole Notat មេដឹកនាំសហជីព CFDT បានសំរេចចិត្តថាមិនអោយមានកូនតែម្តង៕
ទៅអនាគតបើស្ត្រីដែលជ្រើសរើសយកការងារជាជាងការបំពេញតួនាទីជាមាតាកាន់តែកើនឡើងនោះពិភពលោកច្បាស់ជាជួបវិបត្តិដូចក្នុងរឿងមិនខាន។ អីចឹងស្ត្រីមិនបាច់រៀនជ្រៅជ្រះពេកទេមែនទេ? :D
Recent Comments Gravatars