អាហារធ្វើពីសណ្ដែកសៀង អាចទប់ស្កាត់ការប្រេះស្រាំឆ្អឹងត្រគាក ចំពោះស្ត្រីវ័យចំណាស់

From: http://www.women.open.org.kh/km/foodfromsoybeen-makebonestrong

ការសិក្សាមួយរបស់សិង្ហបុរីបានឲ្យជាយោបល់ថា ស្ត្រីអស់រដូវអាចនឹងកាត់បន្ថយឱកាសនៃការប្រេះស្រាំឆ្អឹងត្រគាក ឲ្យកាន់តែតិចជាងមុន ដោយគ្រាន់តែបន្ថែមអាហារផ្សេងៗដែលធ្វើពីសណ្ដែកសៀងទៅលើអាហារ ប្រចាំថ្ងៃរបស់ពួកគេ។

បណ្ឌិត វ៉ុន ពួយកូ (Woon Puay Koh) នៅសាកលវិទ្យាល័យជាតិសិង្ហបុរី និងសហការីបានរកឃើញថា ស្ត្រីដែលចូលរួមក្នុងការស្រាវជ្រាវមានអត្រាពី២១ ទៅ៣៦ភាគរយ តិចជាងមុនក្នុងការប្រេះស្រាំឆ្អឹងត្រគាករបស់ពួកគេ នៅពេលដែលគេរាយការណ៍ថា បានហូបអាហារធ្វើពីសណ្ដែកសៀងនៅក្នុងកម្រិតមធ្យម។

នៅក្នុងការសិក្សារបស់ពួកគេនោះ ការហូបអាហារសណ្ដែកសៀងជារៀងរាល់ថ្ងៃក្នុងកម្រិតមធ្យម គឺយ៉ាងហោចណាស់ ត្រូវមានប្រូតេអ៊ីនសណ្ដែកសៀង ២,៧ក្រាមសារជាតិ Isoflavones ពីសណ្ដែកសៀងចំនួន៥,៨ក្នុងកម្រិតកាឡូរី ១.០០០ ឬស្មើនឹងតៅហ៊ូចំនួន ៤៩,៤ក្រាម។

បណ្ឌិត វ៉ុន ពួយកូ បានប្រាប់ Reuters Health តាមអ៊ីម៉ែលថា សណ្ដែកសៀងកម្រិតនេះគឺជាធម្មតាខ្ពស់ជាងកម្រិតទាបនៃការបរិភោគ របស់ប្រជាជនដែលរស់នៅលោកខាងលិច។

នៅក្នុងការស្រាវជ្រាវនេះក្រុមរបស់លោក កូ បានពិនិត្យវាយតម្លៃលើការបរិភោគប្រភេទអាហារធ្វើពីសណ្ដែកសៀង របស់ប្រជាជនចិនទាំងប្រុសទាំងស្រីជាង ៦៣.០០០នាក់ ដែលមានអាយុចន្លោះពី៤៥ឆ្នាំ ដល់៧៤ឆ្នាំ ក្នុងអំឡុងឆ្នាំ១៩៩៣ ដល់១៩៩៨ ដែលពេលនោះ គឺពួកគេបានចុះឈ្មោះនៅក្នុងការសិក្សាសុខភាពចិនសិង្ហបុរី។

បន្ទាប់ពីគេតាមដានរហូតមកដល់ឆ្នាំ២០០៦ បានគេរកឃើញថា បុរសចំនួន២៧៦នាក់ និងស្ត្រីចំនួន៦៩២នាក់ មានបញ្ហាប្រេះស្រាំឆ្អឹងត្រគាក។ ចំពោះបុរសគឺពួកគេមានអាយុ ៧១ ឆ្នាំជាមធ្យម និងស្ត្រីវិញមានអាយុ៧៣ឆ្នាំជាមធ្យម នៅពេលដែលពួកគេកើតមានបញ្ហាប្រេះស្រាំឆ្អឹងត្រគាកនោះ។ អ្នកស្រាវជ្រាវបានរាយការណ៍ការរកឃើញការរកឃើញរបស់ពួកគេនៅក្នុង ព្រឹត្តិបត្រ American Journal of Epidemiology។

ដូចបានរៀបរាប់ខាងលើ ការបរិភោគអាហារធ្វើពីសណ្ដែកសៀងក្នុងកម្រិតមធ្យមមានទំនាក់ទំនង ជួយកាត់បន្ថយគ្រោះថ្នាក់ដែលធ្វើឲ្យប្រេះស្រាំឆ្អឹងត្រគាករបស់ ស្ត្រី ប៉ុន្តែការបរិភោគអាហារសណ្ដែកសៀងមិនបានជួយកាត់បន្ថយការ ប្រេះស្រាំឆ្អឹងត្រគាករបស់បុរសឡើយ។

ការរកឃើញនាពេលនេះវាស្របគ្នានឹងលទ្ធផលនៃការស្រាវជ្រាវលើ ស្ត្រីអស់រដូវដែលគេធ្វើការសិក្សាកាលពីពេលកន្លងទៅលើស្ត្រី ចិននៅក្នុងទីក្រុងស៊ាងហៃ ដែលបង្ហាញថា ស្ត្រីដែលបរិភោគសណ្ដែកសៀងក្នុងបរិមាណច្រើនមានការធ្លាក់ចុះ អត្រាគ្រោះថ្នាក់នៃការប្រេះស្រាំឆ្អឹងត្រគាកបានដល់ទៅ៣០ភាគរយ។

បណ្ឌិត វ៉ុន ពួយកូ និងសហការីបានសន្និដ្ឋានថា ប្រសិទ្ធភាពការពារឆ្អឹងរបស់សារជាតិ Isoflavones ប្រហែលជាដើរតួយ៉ាងសំខាន់ចំពោះសុខភាពឆ្អឹងរបស់ស្ត្រីអស់រដូវ៕