Fight against obesity

ដើម្បីដឹងថា អ្នកលើសគីឡូឬអត់ គ្រូពេទ្យផ្អែកលើការសន្និដ្ឋានច្រើនយ៉ាង ក្នុងចំណោមនោះមានការសន្និដ្ឋាន ដោយផ្អែកលើតម្លៃ IMC របស់អ្នក។

គណនា IMC របស់អ្នក

IMC (Indice de Masse Corporelle=Body Mass Index =BMI )របស់អ្នកស្មើនឹងទម្ងន់ ចែកនឹងការេនៃកម្ពស់របស់អ្នក។ ឧទាហរណ៍បើអ្នកមានទម្ងន់ 75kg ហើយមានកម្ពស់ 1,65m នោះ IMC របស់អ្នកស្មើនឹង

$\displaystyle \frac{75}{1,65 \times 1,65}=27,5 kg/m^2$

តម្លៃចន្លោះ 25 និង 30 ចាត់ទុកថាលើសគីឡូ

បើសន្ទស្សន៍ IMC របស់អ្នកមានតម្លៃរវាង 18,5 និង 25 នោះអ្នកមានទម្ងន់ធម្មតា។ តែបើសន្ទស្សន៍នេះនៅចន្លោះ 25 និង 30 នោះអ្នកត្រូវចាត់ទុកថាលើសគីឡូ។ បើអ្នកមានសន្ទស្សន៍ IMC ក្នុងលំដាប់ពី 25 ទៅ 30 អ្នកត្រូវចាប់ផ្ដើមប្រុងប្រយ័តចំពោះចំណីអាហារ ដោយសម្របខ្លួនចំពោះរបបអាហារថ្មី និងការអនាម័យក្នុងការរស់នៅឱ្យបានល្អជាងមុន។ ជាពិសេសបើអ្នកឡើងគីឡូយ៉ាងខ្លាំងក្នុងរយៈពេលចុងក្រោយនេះ ឬក៏អ្នកកំពុងឋិតក្នុងសភាពដែលប្រឈមនឹងការឡើងគីឡូបំផុត ដូចជា អ្នកទើបបោះបង់ការពិសារបារី, អ្នកឋិតក្នុងស្ថានភាពស្ត្រេស, អ្នកជិតអស់រដូវ ។ល។

ចាប់ពី 30 ឡើងទៅ មានន័យថា ធាត់ជ្រុល (obésité)

នៅពេលដែល IMC របស់អ្នកធំជាងឬស្មើ 30 មានន័យថាអ្នកធាត់ជ្រុល ដែលភាសាបារាំងហៅថា អុបេស៊ីតេ (obésité) ។ អូបេស៊ីតេ ជាការលើសនៃបរិមាណខ្លាញ់ក្នុងជាលិកាខ្លាញ់ (tissu adipeux) ដែលបង្កឱ្យទម្ងន់ខ្លួនមនុស្សធ្ងន់លើសពីធម្មតាយ៉ាងខ្លាំង។

បើសន្ទស្សន៍ IMC របស់អ្នកមានតម្លៃចាប់ពី 35 ឡើងទៅ នោះអ្នកចូលដល់ករណីគ្រោះថ្នាក់ ហើយបើសន្ទស្សន៍នេះខ្ពស់ជាង 40 នោះអ្នកចូលដល់ករណីមានជំងឺ។ បើសន្ទស្សន៍នេះកាន់តែខ្ពស់ នោះការប្រឈមនឹងជំងឺក៏កាន់តែខ្ពស់ដែរ (ទឹកនោមផ្អែម លើសឈាម ជំងឺគាំងបេះដូង …)។ ប៉ុន្តែការគណនានេះក៏មិនប្រាកដប្រជាមួយរយភាគរយដែរ។ ជួនកាលអ្នកខ្លះយើងគណនាឃើញ IMC របស់គាត់មានតម្លៃ 30 តែគាត់មិនមានធាត់លើសគីឡូអ្វីសោះ។ ករណីនេះធ្លាប់កើតមានចំពោះកីឡាករ។ សន្ទស្សន៍នេះក៏មិនអាចយកមកវាយតម្លៃថាមនុស្សម្នាក់មានជំងឺឬអត់បានដែរ។ ដូច្នេះហើយបានជាគ្រូពេទ្យត្រូវពិនិត្យបន្ថែមតាមវិធីរបស់គាត់ផ្សេងទៀត។

វាស់ទំហំចង្កេះនិងត្រគាក

គ្រូពេទ្យវាស់ទំហំបរិមាត្រចង្កេះ ដែលជារង្វាស់ប្រវែងមួយជុំចង្កេះ។ បើរង្វាស់បរិមាត្រនេះលើសពី 88cm សម្រាប់ស្ត្រី និង 102cm សម្រាប់បុរស នោះគេនិយាយថាអ្នកនោះចូលក្នុងករណីអុបេស៊ីតេ។ សព្វថ្ងៃនេះយើងដឹងថា បើក្បាលពោះកាន់តែធំ នោះការប្រឈមនឹងជំងឺក៏កាន់តែខ្លាំង។

អ្នកខ្លះគេវាស់ធៀបទំហំចង្កេះនឹងទំហំត្រគាក។ ត្រូវចាត់ទុកថាធាត់បើផលធៀបនេះធំជាង 1 ចំពោះបុរស និង 0,85 ធំជាង ចំពោះស្ត្រី។