ក្នុងពេលមានផ្ទៃពោះមានស្ត្រីជាច្រើនកើតរោគផ្ដាសាយធម្មតា តែពុំជះឥទ្ធិពលអ្វីធ្ងន់ធ្ងរដល់ទារកនៅក្នុងផ្ទៃឡើយ ។ ប៉ុន្តែប្រសិនបើអូសបន្លាយពេលយូរ ហើយសីតុណ្ហភាពនៅក្នុងរាងកាយមានកម្ដៅប្រហាក់ប្រហែលចន្លោះ ៣៩ អង្សា ជាច្រើនថ្ងៃ គឺចៀសមិនផុតពីការប៉ះពាល់ដល់សុខភាពរបស់ទារកនៅក្នុងផ្ទៃនោះ ឡើយ។ ក្រៅពីនោះ ការក្ដៅខ្លួនខ្លាំង មេរោគក៏អាចធ្វើឲ្យរំញោចដល់ស្បូនរួញដែលបណ្ដាលឲ្យមានការរលូតកូន និងកើតកូនមុនពេលកំណត់។
ខាងក្រោមនេះជាវិធី ១១ យ៉ាង សម្រាប់ស្ត្រីមានគភ៌ក្នុងការការពារជំងឺផ្ដាសាយ។
១-ទឹកខ្ញី ស្ករក្រហម
នៅពេលអ្នកមានភាពស្រៀវស្រាញ ឬ មានអារម្មណ៍ថាបម្រុងនឹងកើតរោគផ្ដាសាយនោះ ត្រូវទទួលទានទឹកខ្ញីលាយស្ករក្រហមក្ដៅៗមួយចានចង្កឹះរួចហើយសម្ងំ ដេក ។ ម៉្យាងទៀតឧស្សាហ៍ទទួលទានខ្ទឹមស ឬ ខ្ទឹមក្រហមឲ្យបានញឹកញាប់ ព្រោះវាពុំគ្រាន់តែអាចមានប្រសិទ្ធភាពការពាររោគផ្ដាសាយប៉ុណ្ណោះ ទេ ថែមទាំងអាចទប់ស្កាត់មេរោគនៅក្នុងពោះបានទៀផង។
២-ប្រព័ន្ធការពារផ្លូវដកដង្ហើម
នៅពេលខ្វះជាតិស័ង្កសី មុខងារនៃប្រព័ន្ធការពារផ្លូវដកដង្ហើមចុះខ្សោយ ។ ដូច្នេះចំពោះស្ត្រីមានគភ៌គួរស្រូបយកជាតិស័ង្កសីឲ្យបានច្រើនពី ក្នុងអាហារ ដូចជា គ្រឿងសមុទ្រ, សាច់លាយខ្លាញ់តិចតួច, សណ្ដែកដី, គ្រាប់ឈូករ័ត្ននិង អាហារដែលផលិតចេញពីប្រភេទសណ្ដែក។
៣-ជីវជាតិ C
ស្ត្រីមានគភ៌ពេលកើតរោគផ្ដាសាយ គួរទទួលទានអាហារដែលសម្បូរទៅដោយជីវជាតិ C ឬក៏ផឹក និង លេបថ្នាំជីវជាតិ C ។ អាហារដែលសម្បូរជីវជាតិ C រួមមាន ប៉េងប៉ោះ, ផ្កាស្ពៃ, ម្ទេសបូកគោ, ក្រូចឃ្វិច ឬ ក្រូចពោធិ៍សាត់, ស្ត្របឺរី, ឪឡឹក និង ផ្លែទំពាំងបាយជូរ…។ល។
៤-ខ្ពុរមាត់ជាមួយនឹងទឹកអំបិល
ជារៀងរាល់ព្រឹកពេលក្រោកពី ដំណេក ក្រោយពេលលុបលាងមុខ និង ដុះធ្មេញរួច គឺត្រូវខ្ពុរមាត់ជាមួយទឹកអំបិលប្រៃឡែមៗ ។ បន្ទាប់ត្រូវផឹកទឹកដាំពុះឲ្យបានកន្លះកែវ ព្រោះពុំគ្រាន់តែអាចការពាររោគផ្ដាសាយប៉ុណ្ណោះទេអាចមានផល ប្រយោជន៍ដល់សុខភាពនៃអញ្ចាញធ្មេញទៀតផង ព្រោះស្ត្រីកំពុងតែមានគភ៌ អញ្ចាញធ្មេញឧស្សាហ៍ចេញឈាម ដែលងាយនឹងបណ្ដាលឲ្យកើតរោគរលាកអញ្ចាញធ្មេញ។
៥-ពេលព្រឹកលុបមុខនឹងទឹកត្រជាក់
នៅពេលក្រោកពីដេកនាពេល ព្រឹកព្រលឹម ប្រើទឹកត្រជាក់សម្រាប់លុបមុខអាចបង្កើនថាមពលប្រឆាំងនឹងជំងឺ ផ្ដាសាយ ។ នៅពេលយប់មុនចូលដំណេក អាចប្រើទឹកក្ដៅឧណ្ហៗលុបមុខ ព្រោះទឹកត្រជាក់អាចរំខានដល់ដំណេក ។
៦-រក្សាសំណើមនៅក្នុងបន្ទប់ឲ្យបាន ៤៥ ភាគរយ
នៅរដូវរងា គេតែងប្រើឧបករណ៍កម្ដៅដើម្បីធ្វើឲ្យមានខ្យល់អាកាសក្ដៅឧណ្ហៗនៅ ក្នុងបន្ទប់ ប៉ុន្តែខ្យល់អាកាសនេះប្រែទៅជាស្ងួតហែងទៅវិញ ហើយខ្យល់អាកាសស្ងួតហែងនេះធ្វើឲ្យមេរោគអាចប្រមូលផ្ដុំ និង រស់រានមានជីវិតនៅក្នុងផ្លូវដកដង្ហើម ។ ដូច្នេះនៅក្នុងបន្ទប់ គួរប្រើឧបករណ៍បន្ថែមសំណើមមួយទៀត ដើម្បីរក្សាឲ្យមានខ្យល់អាកាសមិនក្ដៅពេក មិនត្រជាក់ពេក និង កម្រិតសំណើម ៤៥ ភាគរយ។
៧-ឆ្ពុងទឹកខ្មេះ
វិធីឆ្ពុងនឹងទឹកខ្មេះ ដើម្បីការពារផ្ដាសាយនេះកំពុងតែស្ថិតក្នុងការជជែកវែកញែកនៅឡើយ ប៉ុន្តែដោយសារតែពុំមានផលវិបាកនោះ ទើបមានគ្រួសារខ្លះនៅតែអនុវត្តវិធីនេះដដែល។
៨-មិនត្រូវបំភ្លេចទឹកដាំពុះ
ការផឹកទឹកច្រើនមានប្រសិទ្ធភាព ខ្ពស់អាចការពាររោគផ្ដាសាយ និង រោគរលាកបំបង់-ក។ ដូច្នេះក្នុងមួយថ្ងៃ យល់ល្អត្រូវផឹកទឹកឆ្អិនឲ្យបានពី ៦០០ ទៅ ៨០០ មីលីលីត្រ។
៩-ផ្លាស់ប្ដូរខ្យល់អាកាស
ត្រូវតែឲ្យខ្យល់អាកាសបរិសុទ្ធ ចេញចូលឥតឈប់ឈរនៅក្នុងបន្ទប់។ ដូចនេះមានមនុស្សជាច្រើនចូលចិត្តបើកទ្វារបង្អួចដើម្បីឲ្យខ្យល់ អាកាសចេញចូលនៅពេលព្រឹកព្រហាម ហើយក្រោយពីនោះស្រាប់តែបិទបង្អួចជិតឈឹងពេញមួយថ្ងៃ។ ការធ្វើបែបនេះមិនល្អឡើយ ព្រោះយ៉ាងហោចណាស់ក្រោយពេលដេកថ្ងៃ និងមុនពេលចូលដេកយប់ គឺត្រូវឲ្យមានខ្យល់អាកាសខាងក្រៅចូលក្នុងបន្ទប់ដើម្បី ផ្លាស់ប្ដូរខ្យល់អាកាស។
ម៉្យាងទៀត ត្រូវបើកទ្វារបង្អួចក្រោយពេលព្រះអាទិត្យរះទើបជាការល្អព្រោះបើ បើកទ្វារបង្អួចនៅពេលព្រះអាទិត្យមិនទាន់រះ កម្រិតនៃជាតិកាបូនឌីអុកស៊ីតនៅខាងក្រៅមានកម្រិតខ្ពស់ ដែលមិនអំណោយផលដល់ស្ត្រីមានផ្ទៃពោះឡើយ។ ប្រសិនបើ សន្ទស្សន៍នៃខ្យល់អាកាសកខ្វក់មានទំហំធំធេង ខ្យល់អាកាសពុំត្រូវបានផ្លាស់ប្ដូរឡើយ តែគេអាចប្រើឧបករណ៍បឺតស្រូបយកខ្យល់អាកាសថ្មី។
១០-គេចចេញពីហ្វូងមនុស្ស
មិនទៅ ឬ ក៏ទៅដែរ តែតិចតួចប៉ុណ្ណោះនៅតាមទីសាធារណៈដែលប្រមូលម្ដុំហ្វូងមនុស្ស ព្រោះមនុស្សកាន់តែច្រើន អត្រានៃការចម្លងជំងឺក៏កាន់តែច្រើនដែរ។
១១-រក្សាឲ្យបានខ្ជាប់ខ្ជួននូវការហាត់ពត់លត់ដំ
ការហាត់ ពត់លត់ដំគឺលើកកម្ពស់ដល់រាងកាយដើម្បីប្រឆាំងនឹងជំងឺផ្សេងៗដ៏ មានប្រសិទ្ធភាព។ ដូច្នេះស្ត្រីកំពុងតែមានគភ៌ គួររក្សាឲ្យបានខ្ជាប់ខ្ជួននូវការហាត់ពត់លត់ដំទាំងផ្នែករាងកាយ និង គំនិត៕
Recent Comments Gravatars